Эксперты Еўразійскага банка развіцця (ЕАБР) прааналізавалі, якая сітуацыя на рынку працы ў Беларусі. «Заробкі растуць, вакансій становіцца больш», — адзначаюць аналітыкі. На іх думку, на фоне дэфіцыту кадраў можна чакаць, што наймальнікі будуць і далей падымаць выплаты сваім работнікам.
У студзені рэальны заробак, які разлічваюць з улікам інфляцыі, у Беларусі павялічыўся на 13,5% гадавых, адзначаюць у ЕАБР. За месяц да гэтага яго рост быў на ўзроўні 12,5%.
«У бюджэтным сектары заробкі выраслі на 13% гадавых, чаму спрыялі павышэнне базавай стаўкі аплаты працы (+6,7%) і дадатковыя надбаўкі для асобных катэгорый работнікаў, — удакладняюць эксперты. — У пазабюджэтным сектары аплата працы расла ва ўсіх галінах, асабліва ў будаўніцтве (+18,8% гадавых), сельскай гаспадарцы (+17,5%) і гандлі (+15%)».
У ЕАБР мяркуюць, што наймальнікі будуць і далей падымаць заробкі на фоне сітуацыі на рынку працы.
«Асноўны фактар росту — дэфіцыт кадраў. Чакаем далейшага росту заробкаў на фоне высокай канкурэнцыі за кадры і прадугледжанага ў бюджэце павелічэння аплаты працы ў дзяржаўным сектары», — прагназуюць эксперты.
На 3 сакавіка ў Беларусі не хапае 188,7 тыс. работнікаў. Столькі прапановаў ад наймальнікаў размешчана ў агульнарэспубліканскай базе вакансій.
Нагадаем, у Беларусі за студзень гэтага года, паводле звестак Мінпрацы, павялічылася колькасць тых, хто зарэгістраваны ў цэнтрах занятасці. Пры гэтым за першы месяц 2025-га стала больш занятых у эканоміцы, паведамляў раней Белстат.