Опубликовано 15 студзеня 2025 у 18.38
Адрес в интернете: https://zerkalo-news.online/news/life/88570.html    

На Брэстчыне нядаўна да смерці замерз голы мужчына — яго адзенне было побач. Чаму так адбываецца

Як стала вядома 11 студзеня, у Ляхавіцкім лесе да смерці замерз нецвярозы 59-гадовы мужчына. Побач з ім знайшлі яго адзенне. Чаму так адбываецца, падчас прэс-канферэнцыі адказаў загадчык падстанцыі № 11 хуткай дапамогі ў Мінску Яўген Юдакоў.

Выява выкарыстоўваецца ў якасці ілюстрацыі. Фота: TUT.BY

Спецыяліст адразу адзначыў, што абставіны гэтага здарэння яшчэ трэба высветліць праваахоўным органам, але дапусціў наступнае:

«Але як здагадка — магчыма, ён намачыў сваё адзенне, і, натуральна, яму было досыць холадна ў прамоклым адзенні. І ў гэтай сітуацыі зняць прамоклае — лагічнае рашэнне. Але, імаверна, у яго не аказалася з сабой сухога адзення, каб у яго пераапрануцца», — сказаў Юдакоў.

Як піша Smartpress, у гэтым выпадку гаворка можа ісці пра даволі распаўсюджаную з’яву «парадаксальнага раздзявання». Упершыню яе апісалі нямецкія судмедэксперты ў 1995 годзе. Аўтары прааналізавалі 69 выпадкаў гібелі людзей ад пераахаладжэння з 1978 па 1994 год і выявілі, што кожнага чацвёртага замерзлага ў розных абставінах чалавека знаходзілі раздзетым.

Судмедэксперты мяркуюць, што раздзяванне падчас замярзання — вынік перыферычнай вазадылатацыі (пашырэння крывяносных сасудаў у целе са зніжэннем крывянога ціску), якая выклікае адчуванне цяпла. Чалавек у гэты момант адчувае хвалю жару і зрывае з сябе адзенне, чым яшчэ больш пагаршае сваё становішча.

Парадаксальнае раздзяванне вядомае і ў альпінісцкіх колах: зафіксаваныя выпадкі, калі замерзлых людзей знаходзілі раздзетымі ў пячоры ці ў снезе, а непадалёк ляжала іх акуратна складзенае адзенне.

Часцей за ўсё ад гіпатэрміі гінуць пажылыя або хворыя людзі, дзеці ці людзі ў стане наркатычнага або алкагольнага ап’янення.

Як зразумець, што вы атрымалі абмаражэнне, і як нельга грэцца

Юдакоў нагадаў, што часцей за ўсё абмаражэнне зазнаюць пальцы, нос, вушы. Першыя прыкметы, што нешта не так, — гэта страта адчувальнасці і белы колер скуры. А падчас іх сагравання пачынаецца рэзкі боль. Усе гэтыя прыкметы — падстава звярнуцца па медыцынскую дапамогу.

Не варта выкарыстоўваць для расцірання снег.

«Яго крышталі прыводзяць да дадатковай траўматызацыі скуры, якая ўжо пашкоджаная тэмпературай», — растлумачыў ён.

Не варта расціраць пашкоджаныя часткі гарэлкай ці спіртам — яны выклікаюць увільгатненне і дадатковае цеплаадвядзенне ад тканін.

Не рэкамендуецца сагравацца ў гарачай ванне. Пераахалоджаную частку цела трэба саграваць павольна: пачаць з досыць прахалоднай тэмпературы вады, паступова яе павялічваючы.

Апранайцеся цёпла і не курыце.

Насіце шапку, шалік, пальчаткі. Абутак не мусіць быць цесным. Медык папярэдзіў, што алкаголь пагаршае стан — дае адчуванне ўяўнага сагравання, пры якім складана зразумець, што вы змерзлі.

У моцны мароз пажадана шмат не хадзіць на дварэ. Акрамя таго, на ветры імавернасць атрымаць абмаражэнне нашмат вышэйшая.

Курэнне на марозе зніжае перыферычную цыркуляцыю крыві і робіць арганізм больш уразлівым да холаду.

Падчас маразоў пажадана не насіць металічныя ўпрыгожанні (пярсцёнкі, завушніцы) — метал у сілу сваёй цеплаправоднасці адводзіць цяпло ад цела, і можа ўзнікнуць пераахаладжэнне і абмаражэнне. Не варта і мачыць скуру.

Ігнат Пекарэвіч / «Зеркало»


Распечатано с портала ZERKALO.IO