Мінскі гарадскі суд 12 студзеня агучыў прысуд экс-міністру лясной гаспадаркі Віталю Дрожжу за хабарніцтва. Яго асудзілі на 7,5 года пазбаўлення волі, але па амністыі скарацілі яму год, перадае Sputnik.
Суд прызначыў Віталю Дрожжу 7,5 года пазбаўлення волі, але год яму «скінулі» па амністыі. Такім чынам, ён будзе адбываць у папраўчай калоніі ўзмоцненага рэжыму 6,5 года.
Пракурор падчас спрэчак папрасіў суд прызнаць Дрожжу вінаватым у здзяйсненні карупцыйнага злачынства і прызначыць яму 7,5 года пазбаўлення волі, штраф і прымяніць амністыю ў выглядзе аднаго года.
Дрожжа абвінавачваўся па ч. 3. арт. 430 (атрыманне хабару ў асабліва буйным памеры).
Яго абвінавацілі ў тым, што ён не пазней за 30 чэрвеня 2020 года з карыслівых меркаванняў дамовіўся з заснавальнікам і дырэктарам кампаніі з Германіі пра атрыманне хабару за спрыяльнае вырашэнне пытанняў, якія ўваходзяць у яго кампетэнцыю. Гаворка ішла пра набыццё ў інвестара сушыльных комплексаў, поўную і своечасовую аплату. Суму хабару хабарадаўца вызначыў самастойна, а Дрожжа пагадзіўся.
Экс-міністр з заснавальнікам і кіраўніком замежнага ТАА распрацавалі злачынны план па перадачы хабару. У схему былі ўцягнутыя работнікі, што не ведалі пра злачынства, а таксама сваячка экс-міністра.
Пасля абнаяўлівання грошы паводле загадзя распрацаванай схемы перадаваліся абвінавачанаму праз яго сястру ў тым ліку. Хабар быў перададзены часткамі — тры разы па 10 тысяч даляраў. Чацвёрты раз перадача не адбылася, бо сястра забыла іх дома. А ў красавіку 2022 года грошы былі канфіскаваныя па месцы жыхарства дома ў сястры.
Дрожжа ў поўным аб’ёме прызнаў віну ў атрыманні хабару ў памеры 30 тысяч даляраў.
Віталь Дрожжа быў затрыманы 16 красавіка 2022 года, з 18 красавіка таго ж года ён знаходзіцца пад вартай. У траўні 2022 года стала вядома, што ён вызвалены ад пасады «ў сувязі са здзяйсненнем правіны, несумяшчальнай са знаходжаннем на дзяржаўнай службе».
Суд па яго справе пачаўся 8 снежня 2022 года.