Амбасадары Еўрасаюза 14 траўня ўзгаднілі 17-ы пакет санкцый супраць Расіі, паведамляе Agence France-Presse са спасылкай на дыпламатычныя крыніцы.
Гэтую інфармацыю таксама пацвердзіў карэспандэнт «Радыё Свабода» Рыкард Ёзвяк.
«Амбасадары ЕС толькі што далі зялёнае святло 17-му пакету санкцый у дачыненні да РФ. Паралельна яны таксама ўхвалілі больш санкцый супраць Расіі за парушэнні правоў чалавека, гібрыдныя ўмяшанні ва ўсім свеце і распаўсюд хімічнай зброі», — напісаў ён у Х.
Нагадаем, раней СМІ паведамілі, што новы пакет санкцый уключае абмежаванні супраць больш чым 100 суднаў расійскага «ценевага флоту», а таксама больш за 50 фізічных і юрыдычных асоб, у тым ліку з Кітая.
Акрамя таго, прадугледжаны ўзмоцнены экспартны кантроль над таварамі і тэхналогіямі, якія могуць выкарыстоўвацца расійскай арміяй. Пад абмежаванні трапіць 31 кампанія, якая падтрымлівае расійскі ВПК або дапамагае абыходзіць санкцыі. З гэтых прадпрыемстваў 13 знаходзяцца за межамі Расіі, а сярод новых фігурантаў санкцыйнага спісу пяць знаходзяцца ў Кітаі.
Пры гэтым будзе падоўжанае да чэрвеня наступнага года вызваленне ад санкцый праекта «Сахалін-2» (праект па распрацоўцы Пільтун-Астохскага нафтавага і Лунскага газакандэнсатнага радовішчаў у Ахоцкім моры на шэльфе вострава Сахалін), улічваючы яго значнасць для Японіі.
Адна з крыніц Reuters падкрэсліла, што адна з мэтаў пакета — дэманстрацыя таго, што ЕС «усё яшчэ можа дамовіцца пра меры супраць Расіі», нягледзячы на рэгулярныя пагрозы вета з боку лаяльнага Маскве ўрада.
Міністр замежных справаў Францыі раней паведаміў агенцтву AFP, што ЕС збіраецца скаардынаваць выхад новага пакета санкцый з ЗША. У Вашынгтоне ўжо падрыхтавалі свае меры эканамічнага ціску на Расію, у тым ліку супраць газавага гіганта «Газпрам», але пакуль невядома, ці ўхваліць іх прэзідэнт Дональд Трамп.
У той жа час Bloomberg напярэдадні паведаміў, што еўрапейскія лідары гатовыя дачакацца сустрэчы прэзідэнтаў Украіны Уладзіміра Зяленскага і Расіі Уладзіміра Пуціна ў Турцыі, якая можа адбыцца 15 траўня, перш чым прасіць Вашынгтон увесці новыя абмежаванні супраць Масквы.
